Animation

Wasiirka Amniga Maamulka Galmudug oo sheegay in Dagaalkii ka dhacay Gaalkacyo uu soo abaabulay C/wali Gaas.

no responses
Sunday November 22, 2015 - 11:18 under Somali News by admin
mqdefault
Spread the love

Wasiirka Amniga Maamulka Galmudug Cismaan Ciise Nuur (Taar-dhuleed) ayaa ku eedeeyay Maamulka Puntland inay weerar ku soo qaadeen deegaanada Galmudug, isagoo xusay in dagaalka uu haatan istaagay, xaaladuna ay tahay mid degan.

Ugu yaraan 10-ruux oo labada dhinac ah ayaa ku geeriyooday dagaalkii saaka ka bilowday Galkacyo, kaasoo soo gaaray abaarihii duhurnimadii, sida dadka deegaanka ay xaqiijiyeen.

Wasiirka Amniga Galmudug ayaa sheegay in Ciidamada Puntland ee soo weeraray uu ujeedkooda ahaa dhul balaarsi iyo inay dhabar jebiyaan howl galka Galmudug ka waday deegaanadeeda ee ka dhanka ah Al-Shabaab.

“Saakay Galkacyo waxaa 12-kii subaxnimo weerar ku soo qaaday deegaanada Galmudug Ciidamo ka tirsan Puntland oo abaabulan, ujeedkoodana ahaa dhul ballaarsi iyo inay dhabar jebiyaan howl galka aan ka wadno deegaanada ee aan kula dagaalameyno Al-Shabaab”ayuu yiri Wasiirka Amniga Galmudug Cismaan Ciise Nuur

Sidoo kale Wasiirka Amniga ayaa ku eedeeyay Madaxweynaha Puntland C/wali Gaas inuu dagaalkaas soo abaabulay, isla markaana uu maalmahan ku howlanaa iska hor-keena shacabka deegaanada sida uu yiri.

“Xaqiiqdii waxaa dagaalkan ka dambeeyay oo mas’uuliyadeeda leh C/wali Gaas oo muddooyinkan ku howlanaa iska horkeena shacabka deegaanada goboladan, hada dagaalka waa istaagay, xaaladana waa degan tahay”ayuu yiri mar kale Wasiirka Amniga Galmudug.

Waxaa uu sheegay in dhankooda labo askari ka dhaawacmeen, halka dhanka ciidamada Puntland labo askari dhaawac ah ay gacanta ku hayaan, ayna ku booqdeen isbitaalka Galkacyo, kuna wareejinayaan Puntland sida uu yiri.

Ma jirto wax war ah oo ka soo baxay Maamulka Puntland, iyadoo ciidamo fara badan oo wata gaadiidka dagaalka ay barqadii maanta soo buuxiyeen dhanka koofureed ee magaalada Galkacyo qeybta ay Puntland maamusho.

Si kastaba ha ahaatee waxaa soo baxaya baaqyo nabadeed oo labada dhinac loo jeedinayo, iyadoo maamulada deriska horay u dhex maray isku dhacyo dhiig badan ku daatay, waxaana jiray heshiisyo beelaha labada dhinac horay u kala gaareen in nabad lagu wada noolaado.

Kismaayo News Agency

Cadaado, Soomaaliya

Facebook Comments