Category Archives: Somali News

Ciid wanagsan: Meelo badan oo soomalia kamid ah oo laga arkay bisha shawaal

Wadamada islaamka qaarkood ayaa ku dhawaaqay in maalinta beri ay tahay maalinta koowaad ee bisha shawaal .

Wadamada sacuudiga ,imaaraadka,qadar,maleeshiya iyo dalal kale ayaa laga arkay bisha shawaal waxaana beri ay noqoneysa maalinta koowaad ee ciidul fidriga.

Dalka soomalia meelo badan ayaa laga arkay bisa shawaal bilashadeeda waxaana kamid ah meelaha laga arkay,dagmada matabaan ee gobolka hiiraan,deegaan hoostaga magaalada balcad ee gobolka shabeellada dhexe iyo xeta dagmooyinka gobolka banaadir qaarkood sida dayniile iyo dagmada kaaraan ayaa la sheegay in bisha laga arkay.

Inkasto bil qaris uu jiray hadana dadka bisha arkay ayaa umadda u xaqiijiyay in beri ay tahay maalin ciid ah ayna sidaasi ula socdaan.

Waxaan idin kugu hambalyeyneynaa bilashada bisha shawaal ama soonfur ciid mubaarak ayaana leenahay dhamaan Akhristayaasheena sharafta badan.

War hada: Kooxo hubeysan oo gurigiisa ku dhex dishay sargaal ka tirsan ciidamada milatariga soomalia+magaciisa

Wararka ka imaanaya dagmada ceel-waaq ee gobolka gedo ayaa waxa ay sheegayan in dableey hubeysan ay galabta gabal dhicii gurigiisa ku dhex dishay sargaal ka tirsan milatariga soomalia.

Sargaalka la dilay ayaa waxaa lagu magacaabaayay Cabdi rashiid Barre Gurxan oo kamid ahaa taliska ciidamada xooga dalka ee gobolka Gedo.

Kooxda dilka geestay ayaa waxaa la sheegay in ay gudaha ugu galeen sargaalka kadibna ay rasaas la dhaceen marka ay xaqiiqsadeen in uu dhintay ayey goobta ka carareen sida ay warbaahinta u sheegeen dad qaraabada kamid ah.

Maamulka gobolka gedo iyo kan dagmada ceel-waaq ayaa waxa ay ka hadleen dilka Cabdi rashiid Barre Gurxan waxaana ay tacsi u direen ehelada iyo qaraabada uu ka dhintay.

Akhriso: War ka soo baxay wasaaradda shaqada iyo shaqaalaha dowladda oo ku wajahan shaqaalaha…

Dowladda soomalia ayaa mudo seddex maalmood ah fasaxday dhamaan shaqaalaha dowladda munaasbadda ciidul fidriga awgeed.

War qoraal ah oo ka soo baxay wasaaradda shaqada iyo shaqaalaha dowladda federaalka ayaa lagu shaaciyay in shaqaalaha gabi ahaanba la fasaxay si ay ula damaashaadaan eheladooda.

Halkaan hoose ka aqriso qoraalka wasaaradda ka soo baxay

Wasaaradda shaqada iyo arrimaha bulshada waxaa ay ku wargelineysaa dhammaan shaqaalaha hey’adaha Jamhuuriyadda federaalka ah ee Soomaaliya iyo hey’adaha gaarka loo leeyahay shaqaalahooda in ay tahay fasaxa Ciidul Fitriga 2 maalmood iyo hal maalin oo ah maalinta xuriyadda ee gobollada Waqooyi 25-26-27 June 2017 oo maalinta 26 June loo soo raray maalinta Talaadada.

Sida ku cad sharciga shaqaalaha L. 11 Qod. 30aad, farqada 2aad iyo xeerka shaqada(Labour Code 65) ee soo baxay 18/10/1972dii, qodobkiisa 86aad Faqradiisa(b) in ay fasax yihiin shaqaalaha Soomaaliyeed meel kasta oo ay joogaan maalmahaas.

Mareykanka oo muqdisho usoo wareejin doona dhamaan xafiisyadiisa uu hada nairobi ku leeyahay

Safiirka Mareykanka ee Soomaaliya Stephen Schwartz ayaa sheegay in Mareykanka uu mar kale howl-gal diblomaasiyeed oo rasmi ah ku yeelan doono Soomaaliya, marka ay Muqdisho ka furtaan xafiisyo dhammaadka sanadkan.

Safaaraddii Mareykanka ee Soomaaliya ayaa waxaa la xiray sanaddii 1991-kii, markii dagaallada sokeeye ay ka qarxeen dalka.

Xoghayihii hore ee arrimaha dibedda Mareykanka, John Kerry ayaa booqasho uu sanadii 2015 ku tagey Muqdisho ku sheegay in Mareykanka uu billaabi doono dib u aas-aasidda joogitaankii diblomaasiyeed ee Mareykanka uu ku lahaa Soomaaliya.

Stephen Schwartz ayaa sheegay in xarunta cusub ee Mareykanka ee Muqdisho la furi doono bisha October ee sanadkan.

Safiirka ayaa sheegay in dowladda Mareykanka ay hayso lacag ay safaarad cusub uga dhisato Muqdisho, balse ma uusan sheegin waqtiga rasmiga ah.

Howlgalka Mareykanka ee Soomaaliya, ayaa waxaa iminka xarun u ah magaalada Nairobi ee dalka Kenya.

Warbixin kooban: Dowladda maxaa u qabsoomay isbuucii lasoo dhaafay

Mogadishu, 24 June 2017 – Wasiirka Warfaafinta Mudane Cabdiraxmaan Cumar Cismaan (Eng. Yarisow) ayaa ka warbixiyey horumarka Dowladda ee usbuucii la soo dhaafay.

Wasiirka ayaa ka hadlay arrimo ay ka mid yihiin;

Ololo dib u dayactir lagu sameynayo waddooyinka caasimada
Maamulka Degmada Heliwaa oo kaa shanaya qeybaha kala duwan ee bulshada ku dhaqan degmada ayaa 23kii June 2017 bilaabeen Ololo dib u dayactir loogu sameynayo wadooyinka halbowlaha u ah isu socodka gaadiidka iyo dadweynaha ku dhaqan Degmada Heliwaa.

Golaha Wasiirada oo Ansixiyey Hindise Sharciyeedka Isgaarsiinta

Golaha Wasiirada ayaa 22kii June 2017 si wadar oggol ah u ansixiyey Hindise Sharciyeedka Isgaarsiinta Dalka, ka dib dood dheer oo ay ka yeesheen Hindise Sharciyeedka Isgaarsiinta oo ay soo diyaarisey Wasaarada Boostada, Isgaarsiinta iyo Teknelojiyada. Hindise Sharciyeedkan ayaa soo maray heerar kala duwan oo wadatashi lala yeeshay qeybaha ay khuseyso. Sharcigan ayaa horumarinayo isticmaalka isgaarsiinta dalka, waxuuna macaamiisha siinayaa tartan furan oo lagu tartamo qiimo dhimis iyo soo jiidasho macaamiisha. Sharcigan ayaa xaquuq badan siinaya shirkadaha, iyadoo dowladuna ay heleyso dhaqaale bacdamaa canshuur laga qaadayo shirkadaha.

Dowlada Federaalka oo dhiirigelineysa Heshiiska GalMudug & Puntland

Wasiirka Arrimaha Gudaha, Federaalka iyo Dib-u-heshiisiinta ee Xukuumadda Soomaaliya Cabdi Faarax Juxa ayaa usbuucan kulamo la qaatay qaar ka mid ah mas’uuliyiinta maamulada Puntland iyo Galmudug. Wasiir Juxa ayaa goob joog ka ahaa saxiix todobo qodob ka kooban oo ay ku heshiiyeen labada Maamul lana filayo inay horseedaan Nabada Gobolka Mudug. Wasiirka ayaa cadeeyay hadafka dowladda Federaalka ee heshiiska cusub iyo halka ay ka go’do Nabada Gaalkacyo. Masuuliyiinta Gobolka Mudug ee Puntland iyo GalMudug ayaa mar kale sheegay inay ka go’antahay ka mira dhalinta Nabadda Gobolka Mudug.

Golaha Wasiirada oo ansixiyey Hindise Sharciyeedka La Dagaalanka Musuqmaasuqa

Golaha Wasiirada ee Xukuumada Federaalka Soomaaliya ayaa 22kii June 2017 ansixiyey Hindise Sharciyeedka La-Dagaalanka Musuqmaasuqa. Wasaaradda Garsoorka ayaa Golaha Wasiirada horkeentay Hindise Sharciyeedka La Dagaalanka Musuqmaasuqa oo muhiim u ah dowlad wanaaga, isla xisaabtanka iyo kordhinta dakhliga dowlada. Dood dheer ka dib ayey Golaha Wasiiradu si wadar-oggol ah ku ansixiyeen Sharcigan oo dhowaan la horgeyn doono Baarlamaanka.

Dowlada Federaalka oo 5 bilood xiriir ah bixisay mushaaraadkii cidianka & shaqaalaha rayidka ah

Wasiiru Dowlaha Maaliyadda XFS mudane Maxamuud Xayir Ibraahim, oo ay wehliyaan Wasiirka Warfaafinta Eng. Abdiraxman Cumar Osmaan Yarisow, Xisaabiyaha Guud ee Qaranka Axmed Yusuf Muumin Siraaji ayaa 21kii June 2017 kormeer howleed ku tagay Bankiga Dhexe si ay uga qayb qaataan dadajinta mushaarka ciidamada iyo shaqaalaha, oo Ra’iisul Wasaare kheyr amray in la bixiyo inta aan la gaarin Ciida. Wasiirka Warfaafinta ayaa sheegay in bixinta si joogta ah mushaaraadka shaqaalaha iyo ciidamada ay qayb ka tahay balanqaadkii Madaxweynaha, dowladana ilaa hada ay ku guulaystay bixinta mushaaraadka.

Dowlada oo dhaawacyo u qaaday dalka Sacuudiga

Afar iyo Toban Ruux oo shacab ah kana mid ahaa dadkii ku dhaawacmay qaraxyo kala duwan oo ka dhacay Gobolka Banaadir iyo qaar kamid ah Gobollada dalka oo Xaaladooda Caafimaad dalka wax looga qaban waayey ayaa dalka Dibaddiisa loo qaaday 21kii June 2017. Guddi bulshada rayidka ah oo uu u xilsaaray Ra’iisul Wasaaraha Soomaaliya Xasan Cali Khayre ayaa soo Xulay dadkan kuwaas oo ku jiray qaar kamida Cisbitaalada Muqdisho. Dadka la qaaday oo qabay dhaawacyo halis ah oo dalka gudihiisa wax looga qaban waayay ayaa loo duuliyay dalka sacuudiga si loo soo daweeyo.

Wasaarada Waxbarashada oo diyaarisey Qorshe Howleedkeeda

20kii June 2017 ayey Wasaarada Waxbarashada, Hidaha & Tacliinta Sare qaban shir labo cisho socday oo looga hadlayey dib u habaynta qorshe hawleedka wasaaradda, kaas oo taabanaya dardargalinta samaynta manhajka waxbarasho ee dalka, muhiimad kala siinta hawlaha horyaala wasaaradda iyo tayaynta shaqaalaha wasaaradda. Shirka oo lagu qabtay xarunta Akadeemiyada Cilmiga, Fanka iyo Suugaanta ee Muqdisho waxaa ka qaybgalay hawlwadeeno ka tirsan wasaaradda waxbarashada iyo aqoonyahano Soomaaliyeed, kuwaas oo mawduucyadaas ka faalooday labo cisho oo ay isku raaceen Qorshe Howleedka 4ta sano ee soo socota.

Dowlada oo dhagaxdhigtay wado laami ah oo u dhaxeysa Muqdisho iyo Jowhar

Wasiiru Dowlaha Wasaaradda Maaliyadda XFS mudane Maxamuud Xayir Ibraahim ayaa 20kii June 2017 dhagax dhigay dayactir balaaran oo lagu samaynayo 5 km oo ka mid ah wadada isku xirta Muqdisho iyo Jowhar, waxaana munaasabada kala soo qayb galay Madaxweyne ku xigeenka HirShabeele mudane Cali Guudlaawe, Wasiiro ka tirsan maamulka Hirshabelle, Xariiriyaha Mashruuca horumarinta u qaabislan Wasaaradda Maaliyadda Cali Xaaji iyo masuuliyiin kale. Dayactirka wadadaan ayaa waxey qayb ka tahay mashaariic badan oo dowladu ugu tala gashay in lagu horamariyo kaabayaasha dhaqaalaha dalka.

Madaxii Sirdoonka Al-Shabaab G/Benaadir oo gacanta lagu soo dhigay

Dawladda Federaalka Soomaaliya ayaa shaacisay howlgal laga sameeyey Suuqa weyn ee Bakaaraha 19kii June 2017 in lagu soo qabtay Madaxii Amniyaadka Kooxda Al-Shabaab ee gobolka Banaadir C/wahaab Khaliif Axmed oo loo yaqaan (Ciise Tarabuun). Wasiirka Amniga Mudane Maxamed Abuukar Islow Ducaale ayaa sheegay in howlgalkan uu ahaa mid qorsheysan isla markaana uu yahay guul ay soo hooyeen ciidanka Xasilinta Caasimadda.

Cadaalada oo la marsiiyey shaqsiyaad dil u geystay muwaadiniin

Maxkamadda Darajadda Kowaad ee Ciidanka Qalabka Sido ee Soomaaliya ayaa usbuucan dil ku xukuntay eedeysanayaal dil u geystay wasiirkii hore ee Howlaha Guud iyo dib u dhiska iyo Sheekh caan ahaa oo lagu dilay Baydhabo. Gudoomiyaha Maxkamadda Sare ee Darajada Koowaad Gashaanle Xasan Cali Nuur Shuute ayaa ku dhawaaqay xukunka. Ujeedada xukunadan ayaa ah in shacabka Soomaaliyeed ay helaan cadaalad iyo sinnaan. Kiiska Dacwooyinkan ayaa soo socday muddo iyadoo eedeysanayaasha la siiyey fursad ay kiiskooda ku difaacaan.

Warmurtiyeed laga soo saaray Shirweynaha Wadatashiga Qaran ee Hannaanka Dib-u-heshisiinta Soomaaliya

Wasaaradda Arrimaha Gudaha, Federaalka iyo Dib-u-heshiisiinta iyo ergooyinkii shirka ka soo qaybgalay, waxay si wayn ugu faraxsan yihiin in Shirweynaha Wadatashiga Qaran ee Hannaanka Dib-u-heshiisiinta oo hal-ku-dheggiisu ahaa “isku daalnaye, maxaa noo dana!” si habsami leh u qabsoomay intii u dhexaysay 13 ilaa 17ka June 2017. Shirweynahan Qaran waxaa ka soo qayb galay ergo matalaysey dadka Soomaaliyeed oo ka kala yimid Dowlad Goboleedyada, Maamulka Gobolka banaadir iyo marti-sharaf ka kala socday qaybaha bulshada oo tiradoodu isku ahayd 220 xubnood. Ujeedooyinka ugu waaweyn ee shirwaynuhu waxaa ay ahaayeen: 1. In la sameeyo xog-ururin iyo falanqayn la xiriirta khilaafaadka ka jira dalkeena Soomaaliya. 2. In la ogaado baahida dib-u-heshiisiineed ee dalka ka jirta una baahan in wax laga qabto, iyo 3. In la isla aqoonsado awooddaha, aqoonta iyo xirfadaha aan nabadda ku ilaalin karno waxna kaga qaban karno khilaafyada iyo yagleelida aasaas nabadeed oo dalka iyo dadka oo dhan gaara. Halkan ka akhriso Warmuriyeedka oo faahfaahsan

Dowlada oo la wareegtay Gargaar Turkiga soo dhiibtey

Sadex iyo toban kun oo tan oo isugu jira raashiin nafaqeysan iyo dawo oo ah deeq ka timid shacabka dalka Turkiga ayaa Dowlada Federaalka lagu wareejiyey 17kii June 2017. Danjiraha Turkiga ee Soomaaliya Olgan Bekar, oo markabkan deeqda saaran tahay ku wareejiyay dowladda Soomaaliya ayaa sheegay in Turkiga uusan gargaar kaliya ku ekaaneynin ee mashaariic horumarineed oo dhowaan dalka ay ka bilaabi doonaan. Olgan Bekar, danjiraha Turkiga ee Soomaaliya ayaa sidoo kale xusay in deeqdan ay qeyb ka tahay howlaha samafal ee hey’adaha Turkiga ku kaalmeynayo dadka Soomaaliyeed ee abaaruhu saameeyeen. Wasiir ku xigeenka Wasaaradda Gargaarka iyo Maareynta Musiibooyinka ee xukuumadda Soomaaliya mudane Cilmi Cumar Ceynsane ayaa dowladda iyo shacabka Turkiga ugu mahadceliyay is garab istaagooda xilliyada ay caawimaada u baahan yihiin, isagoona xusay in deeqdan la gaarsiin doono dhammaan gobolada dalka.

DHAMAAD

Wasaarada Warfaafinta, Dhaqanka & Dalxiiska
media@moi.gov.so

Weerar lagu qaadi lahaay masjidka barakeysan oo si deg deg ah lagu fashiliyay kadib markii….

Wasaarada arrimah gudaha ee dalka Sacuudi Carabiya ayaa sheegtay in ciidamada ammaanka ee dalkaasi ay fashiliyeen waxa ay ku tilmaameen argagixiso qorshaynaysay in ay bartilmaameedsadaan misaajidka barakaysan ee Maka.

Wasaarada arrimaha gudaha ee Sacuudi Carabiya ayaa sheegtay in dhisma uu ku jiray qofka weerarka fulin rabay ay ciidammada hareereeyeen kadibna uu is qarxiyay.

Dhismaha ayaa burburay waxaana ku dhaawacmay 11 qof oo ay ka mid yiihiin askar booliiska ka tirsan .

Shan qof oo mintidiin ah oo looga shakisan yahay weerarka ayaa xabsiga loo taxaabay sida ay sheegeen saraakiisha .

masaajid

Malaayiin qof oo Muslimiin ah oo ka kala timid daafaha caalamka ayaa isugu soo uruuray magaalada Maka dhamaadka bisha barakaysan ee Ramadaanka si ay u cumreystaan.

Saraakiisha Sacuudiga ma bixin faahfaahin ku aadan weerarkan la fashiliyay.

Sacuudi Carabiya ayaa sanadihii u danmbeeyay waxa soo maray weeraro is xig-xiga oo ay dad ku dhinteen , qaar badan oo ka mid ah weeraradan waxaa sheegataay kooxda la magac baxday Dowladda Islaamka.

Weeraradaas ayaa waxa inta badan lala bartilmaameedsaday dadka Shiicada ah ee looga tirda badan yahay dalkaasi iyo ciidammada ammaanka.

Bishii July 2016, afar ka tirsan ciidamada ammaanka ayaa lagu dilay weerar ismiidaamin ahaa oo lagu qaaday meel u dhaw masaajidka barakaysan ee Madiina .

Akhriso: Taariikhda shiikh mukhtaar roobow abuu mansuur oo mareykanka uu liiska argagaxisada ka saaray

Sheekh Mukhtaar Abuu-Mansuur oo dadka u yaqaanaan Roobow ayey Mareykanka ka saareen liis ay dul dhigeen lacago malaayiin ah, liiska waxaa ka mid ahaa 6 kale oo ka tirsan madaxda Al-shabaab, waxaa xusid mudan in Roobow aan marnaba ka mid noqon liiska argigixisada uu Mareykanka soo saaray.

Hadaba, Waa Kuma Sheekh Mukhtaar Roobow:

Sheekh Mukhtaar Abuu-Mansuur illaa hadda waxaa uu ku magacaaban yahay guddoomiye ku xigeenka xarakada Al-shabaab, waxaa uu ku jiraa aasaasayaashii Xarakada, isaga oo  ka soo jeedaa beesha Leesaan oo ka tirsan Digil iyo Mirifle ee degta gobollada Bay iyo Bakool.

Inta aan loo magacaabin Guddoomiye ku-xigeenka Xarakada Al-shabaab, waxaa uu muddo ahaa afhayeenka Al-shabaab, dalka Mareykanka ayaa sida aan soo sheegnay bishii June 6, 2012-kii ku daray liis la dul dhigay lacag.

Mareykanka waxaa ay sheegeen in $7 Milyan dul dhigeen aasaasaha Al-shabaab Axmed Cabdi Godane, $5 Milyan ragga kala ah Ibrahim Xaaji Jaamac, Fu’aad Maxamed Khalaf, Bashiir Maxamed Maxamud iyo Mukhtaar Roobow halka $3 Milyan la dul dhigay Zakariye Ismaaciil Xersi iyo Cabdullahi Yare.

Tillaabada Mareykanka kadib, Abuu Mansuur Roobow oo ka hadlayey masjid uu salaadda jincaha ku tukaday oo ku yaalo Buur-hakaba waxaa uu sheegay in aanu iska qari doonin Mareyaknaka, waxaana hadaladiisa ka mid ahaa “Aw Mareykanka aniga waxaa jooga Buurhakaba, Masaajidka ayaa salaadii jimcaha ku dukaday, jimcihii hore waxaa ku dukaday Tiyeeglow”.

Bilowgii Xarakada,  Mukhtaar waxaa la sheegaa in Xudur iyo gobollo badan oo Koonfurta Soomaaliya ah uu ka sameeyay xerooyin dadka lagu tababaro, waxaa kale uu isaga ka mid ahaa koox tababar ku soo qaadatay dalka Afgaanistaan.

Mukhtaar Robow waxaa ay isku dhaceen madaxii Al-shabaab Axmed Godane taasi oo keentay in lagu weeraro guri uu ka deganaa degmada Baraawe kadibna uu u baxsaday gobollada Bay iyo Bakool.

3dii sano ee ugu dambeysay waxaa hayey maleeshiyaad beeshiisa ah, waxaana sidoo kale muuqata in uu wada hadal la galay maamulka Koonfur Galbeed iyo dalka Mareykanka, tilaabadan looga laabtay lacagta la dul dhigay waxaa ay soo dedeji kartaa in uu dowladda federaalka ah isku dhiibo.

Al-shabaabta kale:  Sheekh Mukhtaar  Abuu Mansuur wixii ka dambeeyay 2013-kii waxaa uu ka mid ahaa Al-shabaabta aan raacsaneen Axmed Godane.

Kooxdan waxaa ku jiray Ibraahim Afgaan, Abuu Mansuur Al-Amriikii, Sheekh Xasan Dahir Aweys iyo qaar kale, waxaa ay Xarakada Al-shabaab uga goosteen Shabeellada hoose, qaarkood magaalada Marka ayey doon ka raaceen, qaarna Baraawe iyo Mukhtaar Roobow oo aadey dhulkii uu ka soo jeeday.

Goobjoog News

Maamulka koonfur galbeed muxuu ka yiri xayiraadda dowladda mareykanka ay ka qaaday roobow abuu mansuur?

Maamulka Koofur Galbeed ayaa soo dhoweeyay xayiraadii laga qaaday Sheekh Mukhtaar Roobow Abuu Mansuur, kaasoo war ka soo baxay Waaxda Arrimaha Dibadda Mareykanka lagu sheegay in laga saaray liiska Argagixisada Caalamiga ee shaqsiyaadka loogu doon doonista badnaa.

Abuu Mansuur ayaa laga waayay bogga abaal marinta Cadaaladda ee Waaxda Arrimaha Dibadda Mareykanka ay ku qornaayeen dadka dunida loogu doonista badan yahay ee ku jira liiska waxa loogu yeero Argagixisada Caalamiga.

Wasiirka Warfaafinta Maamulka Koofur Galbeed Ugaas Xasan Maxamed Cabdi oo la hadlayay Idaacada VOA ayaa sheegay inay soo dhoweynayaan xayiraada laga qaaday Abuu Mansuur.

“Waa soo dhoweynayaa xayiraada laga qaaday Abuu Mansuur oo ahaa nin ka soo jeeda deegaanada Koofur Galbeed, anaga waxba kalama socono qaabka Mareykanka xayiraada ugu qaaday”ayuu yiri Wasiirka Warfaafinta Koofur Galbeed.

Sidoo kale waxaa uu sheegay in horay Abuu Mansuur u sii daayay mas’uuliyiin ka tirsanaa dowladda, sanado ka hor markii Al-Shabaab ay la wareegeen magaalada Baydhabo ee Gobolka Baay.

Abuu Mansuur ayaa la sheegay in wada hadalo aan toos aheyn uu u socday dowladda Soomaaliya, waxaa uu afartii sano ee la soo dhaafay ku sugnaa deegaanada howdka ee Gobolka Bakool, waxaa ilaalinaya dagaalyahano beeshiisa ah.

Warar isa soo taraya ayaa sheegaya in Abuu Mansuur laga yaabo inuu isku soo dhiibo dowladda Soomaaliya, walina ay socdaan wada hadalo, hase ahaatee shuruudaha wada hadaladaas ayaa qeyb ka ahaa in marka hore laga saaro liiska Argagixisada.

Maraeykanka waxaa ay sheegeen in $7 Milyan dul dhigeen aasaasaha Al-shabaab Axmed Cabdi, $5 Milyan ragga kala ah Ibrahim Xaaji Jaamac, Fu’aad Maxamed Khalaf, Bashiir Maxamed Maxamud iyo Mukhtaar Roobow halka $3 Milyan la dul dhigay Zakariye Ismaaciil Xersi iyo Cabdullahi Yare.

TOP NEWS: Maxaa ka jira in dowladda mareykanka si rasmi ah liiska argagaxisada uga saartay Mukhtaar Rooboow abuu mansuur?

Wasaarada Arrimaha Dibadda ee Mareyknaka ayaa shaley ku dhawaaqdey in ay ka saartey liiska dadka lacagta hore ay u dul-dhigtey kuxigeenkii Alshabab, Muqtaar Roobow Abu Mansoor oo wayadanba si gaar ah u joogay gobolka Bakool.

Shan sano ka hor, bishii June ee 2012 ayaaa la saarey madaxa Abu Mansoor 5 Malyan oo doolarka Mareyka ah.

Khuburada ka faaloota Al-shabab iyo arrimaha gobolka ayaa u arka tani in ay tahay, in dowlada Mareykanka aysan hab ciidan oo kaliya ku wajahaynini dagaalka ka dhanka ah Al-shabab.

Abuu Mansuur ayaa la sheegay inuu xurguf ay soo kala dhex gashay Hoggaamiyihii hore ee Al-Shabaab Abuu Zubeyr, kaddib markii ay dhowr arrimood isku qabteen oo ka mid ahaa Saraakiil ka tirsanaa Ururkaas oo la khaarijiyay, taas ayaana sabab u aheyd inuu gooni uga baxo Kooxda, isagoo sanado ku dhuumaaleysanayay miyiga Gobolada Baay iyo Bakool.

Dowladda soomalia weli kama aysan hadlin go’aankaan mareykanka oo liiska dadka la doon doonaayo uga saaray abuu mansuur oo ka mid ahaay mas’uuliyiinta ugu sar sareysay ururka alshabaab.

Daawo: Maxay ka wada hadleen madaxweyne farmaajo iyo dhiggiisa dalka uganda Yoweri Museveni?

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo iyo dhiggiisa dalka Uganda Mudane Yoweri Kaguta Museveni ayaa caawa kulan ku yeeshay magaalada Kampala. Madaxweynayaasha ayaa ka wada hadlay xoojinta xiriirka labada dal iyo iskaashiga dhinacyada amniga iyo dhaqaalaha.

Madaxweyne Farmaajo ayaa uga mahadceliyay dowladda iyo shacabka Uganda sida wanaagsan ee ay usoo dhaweeyeen qaxootiga Soomaaliyeed. Waxa uu sidoo kale xusay kaalinta aan marnaba la ilaawi karin ee ay Uganda ka geysatay nabad ilaalinta Soomaaliya.

Madaxweynaha Uganda ayaa dhankiisa bogaadiyay hoggaanka cusub ee Dowladda Federaalka Soomaaliya iyo dadaalka dheeriga ee ay kula dagaallamayaan musuqmaasuqa, nabadgalyo xumada iyo faqriga. Wuxuu ballan qaaday in dowladdiisu ay taageero walaaltinimo la garab taagantahay Dowladda Federaalka Soomaaliya.

Waxyaabaha lagu lafo guray kulankan ayaa waxaa kamid ahaa in dowladda Uganda ay taageerto qorshaha ay dowladda Soomaaliya ku dooneyso in ay ku biirto Bulshada Bariga Afrika, oo uu haatan Guddoomiye u yahay Madaxweyne Museveni.

Waxaa la isla soo qaaday maxaabiista Soomaaliyeed ee ku jirtaa xabsiyada dalkan iyo sidii ay dowladda Uganda dib ugu eegi lahayd kiisaska loo haysto maxaabiistaas, xaaladaha cakiran ee ka jira gobolka, gaar ahaan Koonfurta Sudan iyo muran xuduudeedka soo cusboonaaday ee dowladaha Jabuuti iyo Eriteriya.

Labada Madaxweyne ayaa isku afgartay dhammaan qodobadii ay isla soo qaadeen.

Madaxweynaha Jamhuuriyadda waxaa kulankan ku wehliyay Wasiirka Gaashaandhigga Mudane Cabdirashiid Cabdullaahi Maxamed, Wasiiru Dowlaha Arrimaha Dibadda Mudane Cabdulqaadir Axmed-Khayr Cabdi iyo Safiirka Jamhuuriyadda Federaalka Soomaaliya ee dalka Uganda Mudane Sayid Axmed Sheekh Daahir.

DHAMMAAD

Wixii faahfaahin ah kala xiriir,

Cabdinuur Maxamed Axmed
Agaasimaha Warfaafinta Madaxtooyada