AKHRISO:- Aqalka Sare oo dalbaday in la horkeeno Afar kamida Wasiirada Xukuumadda Kheyre 

0

Xubnaha Aqalka Sare ee Baarlamaanka Soomaaliya ayaa Maanta waxa ay u yeereen Afar ka mid ah Golaha Wasiirada Xukuumadda Federaalka Soomaaliya,kadib kulan ay maanta ku yeesheen Xaruntooda Magaalada Muqdisho.

U yeeritaankaan ayaa ka dambeysay kadib markii ay soo korortay dhibaato dhanka xaduudka ah oo ka atagan Magaalada Balad xaawo taas oo u dhaxeysa Ciidamada Kenya iyo Shacabka Magaaladaas.

Senator  Cabdullaahi Sheekh Ismaaciil (Fartaag) ayaa sheegay in dowladda Kenya ay ku soo xadgudubtay dhulka Soomaaliya,isaga oo Golaha Aqalka sare warbixin ka siiyay dhacdooyinkii ugu dambeeyey ee ka dhaca Magaalada Balad Xaawo ee Gobolka Gedo.

Intaasi kadib xubnaha Aqalka sare ayaa u yeeray Afartaan Wasiir oo kala ah Wasiirka Amniga Maxamed Abuukar Isloow Ducaale, Wasiirka Gaashaandhigga Maxamed Mursal Sheekh C/raxmaan, Wasiirka Arrimaha gudaha,Cabdi Maxamed Zabriye iyo Wasiirka Arrimaha Dibada Axmed Ciise Cawad si wax looga weeydiiyo waxa ay ka ogyihiin xadgudubka dowladda Kenya ay ku sameysay dhulka Soomaaliya.